Vi vil prøva å laga referat frå dei fleste kampane:

  Knut Ness ( 11.10.08 ) Uavgjort 5-5 i siste seriekampen.Det var Trott 3 som starta best på grusbanen i Skånevik. Dei spelte godt i lag, og  leia 3-1 til pause. I andre omgang styrka Skånevik laget, og etter kvart var det dei som stod for det beste spelet. Kjel Larsen og Erling Åsheim er gode teknisk på små flater, og Skånevik gjekk etter kvart opp til 5-3. Kampen såg ut til å vera avgjort, men Trott var effektive på sjansane dei fekk, og kampen enda 5-5. Det mest gledelege var at Skånevik i andre omgang  spelte godt på motstandaren sin banehalvdel, god kampånd,  junioren Martin Løhaugen sine to fine mål, og den bitte litt eldre Svein Helge Ytrenes sitt tigersprang på eit Trott skot. Han var og god  og sikker i feltet. Nå avsluttast sesongen med kampar om KM i 7.divisjon mot dei to andre puljevinnarane, Midtbygene 2 og Sandnes-Ulf 4.
 
Knut Ness ( 05.10.08 ) Etter tre år utan A-lag, vann Skånevik 7. divisjon i oppstartsesongen. Opprykket vart klart etter den fine 7-0  sigeren over den hardaste konkurrenten, Fitjar 2.  I første omgang fekk me kanskje årsbeste av heimelaget. Det var godt tempo, samspelet fungerte, og det vart skapt mange sjansar. Det tok litt tid før måla kom, men det vart 3-0 til pause. I andre omgang vart motstanden dårlegare, og Skånevik plussa på med fire mål til, sjølv om tempoet i spelet var dårlegare.  Arve Riebesen har laga mange mål i år, men det mest spektakulære kom i denne kampen med eit brassespark som gjekk over målmannen og inn i det bakre hjørna.  Herleg var og målet der Kjell Larsen dribla seg heilt til kortlinja og la ballen presist på hovudet til Arve.

  Skånevik framstod i første omgang som eit komplett lag. Forsvaret er raskt, teknisk godt, og det les spelet bra.  Midtbanen er ei fin blanding av teknikkarar og folk med innsatsvilje. Framme er det spissar som er raske og sterke avsluttarar. I tillegg har laget fleire gode innbyttarar, og gode gutelagsspelarar er på gang. Dette lover godt. Laget spelte og betre i lag på motatandarane sin halvdel enn tidlegare. Når motstsanden vert noko hardare til neste år, er det nettopp det kollektive trøkket som må løftast enno eit hakk. Då blir det ikkje så lett å dribla 4-5 motspelarar. Men laget har løfta seg i løpet av året, og me gler oss til neste år. Men først skal siste kampen mot Trott 3 spelast.  Ei stor takk til Øyvind Eljervik og dei andre som har drive fram eit A-lag i bygda.

(04.10.08):  A-laget til Skånevik IL vant svært fortent heile 7-0 på heimebane mot Fitjar 2. Sjølv om det er enno ein kamp som står igjen, er Skånevik no klar for opprykk til 6. divisjon.  Gratulerar!  ( Meir stoff om kampen kjem seinare ) Tidlegare på dagen vant gutelaget heile 7 -1 over Halsnøy.  Gratulerar også til trenaren Julio og dei ivrige spelarane på gutelaget.

(21.09.08): Skånevik IL har vunne dei to siste kampane:  I forrige veke vart det 3 - 2 siger over Ølen 2 og på laurdag vant dei heile 6-1 over Stegaberg 2.

Knut Ness ( 06.09.08 ) Karmsund IL - Skånevik 2 -4.   Skånevik fekk ein herleg revansj for poengrøveriet til Karmsund BK i Skånevik i vår. Etter å ha lege under 2-1 til pause, fekk Skånevik endeleg uteljing i 2.omgang og vant 4-2. Første omgang var jamspelt, men Skånevik var berre nære på ved fleire store sjansar. Forsvaret spelte godt, og Svein Helge Ytrenes hindra med nokre gode beinparadar at gjestene gjekk i frå. I andre omgang fekk Skånevik eit betre tak på midtbanen, og spisssane fekk betre utteljing. Med dette har Karmsund sakka bak, og det er  Fitjar 2 som er hardaste motstandaren i toppstriden.

Knut Ness ( 22.06.08 ) Trott 3 - Skånevik  3-7.   Sjølv om Skånevik fekk det første målet, var det Trott som hadde det beste taket på spelet, og dei leia 3-2 til pause.  Skånevikslaget hang ikkje så godt saman, og det var berre dei to gode spissane  som gjorde at laget hang med.  
  Andre omgang vart mykje betre. Lagdelane arbeidde betre saman, og det vart skapt mange sjansar. Tom i mål plukka fint ned innlegga til Trott, og forsvaret klarerte resten. Framover  gjekk pasningsspelet betre, og Trott vart til tider utspelte. Arve Riebesen og Jon Helge Arefjord herja stygt med heimelaget sitt forsvar. Det vart mange sjansar, og nokre av måla var flotte. Finaste målet kom då venstreback Tommy Johansson mottok ein stikkar ut på venstresida, skar inn og suste inn eit bananskot i motsett vinkel. Skånevik viste i andre omgang vilje til hardt arbeid i alle lagdelar, og laget vann omgangen med 5-0. Kjempemoro å sjå denne kampen.

(31.05.08):  Skånevik vant heile 7-2 over Stegaberg 2 på Skånevik stadion.  Heile laget viste god innsats og det var svært positivt at den "gamle" keeperkjempa Svein Helge Ytrenes var tilbake i mål i 2. omgang.  Velkommen tilbake til Skånevik IL Svein Helge!  Arve Ribesen gjorde ein stor kamp og scora heile 5 mål.  Ein bør også spesielt nemna Tommy Johansson og Kjetil Nedreskår for ein flott kamp.  Spelande trenar Øyvind Eljervik scora eit mål på straffe og Leif Bjørnar Larsen på eit fantastisk frispark frå 23 m.  Publikum koste seg i det fine veret og stemninga var god.  Stener og Randi gjorde ein flott innsats i salsbua.  Både publikum og aktive i Skånevik IL ser med lengsel fram til at banetilhøva på stadion blir betre.  Avdeling for drift og vedlikehald i kommunen bør snarast setja igong arbeidet med dette.  I første omgang har kommunestyret avsett kr. 150.000,- for inneverande år til dette arbeidet.

Knut Ness (24.05.08):  Skånevik vant greitt ove Ølen 2 på fredag etter å ha leia 4-1 ved pause.  Ølen hadde problem med å stansa dei beste spelarane til Skånevik, og det var ikkje tilfeldig at Arve Riebesen laga fire mål og Kjell Larsen to. Innimellom viste og laget fine kombinasjonar. Dei beste periodane var i første omgang. Men lettbeinte ølensbuar gav ikkje opp, og spelet floka seg litt til for Skånevik midtvegs i andre omgang. Likevel produserte laget mange sjansar. Dersom Skånevik får fram meir av det spelet som laget glimtvis viste, så lovar det godt for mange kjekke fotballkampar framover.  Det var og moro med eit lokaloppgjer igjen.

Knut Ness (12.05.08):  Etter tre sesongar pause har Skånevik eit A-lag med i serien att. Laget spelar i 7.divisjon, og det slo laurdag Ferkingstad 2 heile 10-1 borte. Kampen gav ikkje noko klart svar på kvar laget står, til det var motstanden for svak. Ferkingstad tape forige kamp 12-0 for Karmsund Ballklubb som toppar tabellen. Nettopp dette laget blir Skånevik sin motstandar i neste runde, torsdag 15.mai i Skånevik. Det blir ein interessant kamp som gir eit betre svar på kva nivå laget held. Kanskje viser det seg at dette blir eitt toppoppgjer i divisjonen?  

Websida til Skånevik IL A-laget