Pressemelding frå dei Norway Foods-tilsette i Skånevik:

UTVIKLING/OMSTILLING SOM ALTERNATIV TIL NEDLEGGING

Det var med forventning me var vitne til at Rieber-konsernet tok over Norway Foods for nokre år sidan, fordi dette konsernet har god økonomi og strenge krav til kvalitet, kostnads-effektivitet og inntening. Me visste at Rieber-konsernet var gode på nasjonal og internasjonal marknadsføring. Som tilsette var me glad for at Rieber-konsernet kom inn på eigarsida og for at det skulle satsast også på Skånevik.

Det er difor med sorg og fortvilelse me er varsla om at Rieber/Norway
Foods-leiinga når vurderar nedlegging av fabrikken i Skånevik. Men me orkar ikkje tanken på å gje opp, når me tenkjer på alle dei negative konsekvensane dette fører med seg for både tilsette og lokalsamfunn. Me er ein god arbeidsstokk som har vilje til å stå på vidare for ein bransje me har tru på.

Før styret i Norway Foods tek si endeleg vurdering av nedlegging av
fabrikken i Skånevik, vil me som tilsette difor be om at det i perioden fram
til 31.12.01 vert gjennomført eit prosjekt som har som formål å fremja
kostnadseffektivitet, utvikling og omstilling. Resultatet av eit slikt
prosjekt bør danna grunnlaget for eit eventuelt nedleggingsvedtak.

Eit slikt prosjekt, som bør ha leiinga, tilsette, staten, fylkeskommunen,
regionen og kommunen som samspelarar, bør ta utgangspunkt i nye krav til
teknologi og produksjonsmetodar. Ein bør sjå korleis det let seg gjera å
produsera billigare til ein stadig meir kravstor og kostnadsmedviten
marknad. Gjennom prosjektet bør det også lagast ein strategi for korleis
Rieber, Norway Foods og ikkje minst dei tilsette i endå sterkare grad kan
marknadsføra norske sardinar nasjonalt og internasjonalt.

Ved hjelp av statlege, fylkeskommunale og selskapsinterne midlar kan ein
gjerne, t.d. i samspel mellom Rieber/Norway Foods, maskinindustrien og norske FoU institusjonar/teknologimiljø utvikle ein produksjonsteknologi som set norskhermetikkindustri i førarsetet att, og som gjer den norske hermetikken lønsam att i den internasjonale marknaden. I tillegg bør det altså også lagast ein strategi der det vert set større marknadsfokus på norske sardinar.

Gjennom prosjektet bør ein også vurdere om andre produkttypar kan vurderast som supplement til sardinproduksjonen. Få land i verda har større mogelegheiter enn Noreg når det gjeld handtering/foredling av sjømat, og det kan bli fleire «King Oscar»-produkt.

Skånevikssamfunnet vil kunna ta på seg å vera ein sentral aktør i
marknadsføringa av hermetikk og andre Norway Foods-produkt. Dei tilsette og bygdefolket er meir enn gjerne innstilt til å stå til teneste, også på eigen
kostnad, i samband med nasjonale og internasjonale marknadskampanjar, gjerne knytt opp til kulturtilskipingar. m.v. Målet må vera å auka salet vesentleg dei næraste åra.

Eit prosjekt bør køyrast målretta og effektivivt. Det bør setjast saman ei
styringsgruppe med representantar frå Rieber, Norway Foods, andre ressursmiljø, tilsette og frå  det offentlege. Det kan kjøpast eksterne fagtenester av dei beste miljøa som finst i inn- og utland.

Eit slikt prosjekt vil kunna koma heile norsk hermetikkindustri, og dei tre
Norway Foodsfabrikkane i Askøy, Fusa og Etne til gode. Etter eit
prosjektperiode på godt og vel eit år kan Norway Foods konkludera me om det bør leggjast ned fabrikkar - eller ikkje.

For dei tilsette ved Norway Foodsfabrikken i Skånevik

Anna Emmerhoff Nilsen